முத்தம்

தாள் துளைப்பானின்
கர்ப்ப சேமிப்பாய் எத்தனைப் பௌர்ணமிகள்
காத்திருப்பு ஓர் முத்தத்தின் நிமித்தம்

உதிரங்கசியும் கள்ளிப் பழச் சுவை
கூதிர் காலத்து உதட்டில்

ஆலங்கட்டி மழைக்குப் பின்னான
பூங்கொத்து அங்காடி

X வடிவ அலுவல் அவசர முத்தங்கள்
பசிக்கு திறந்து கீச்சிடும்
அந்திக்கூட்டின் பிஞ்சு அலகுகள்

Y கவ்விய முத்தத்தில்
மிருதங்கத்துள் தவறி
நுழைந்த எறும்பென உடல்களிடையே
கேரம்போர்டின் சிவப்புக்காய்
ஆகும் துணை கேட்கும் உயிர்

சகி
முத்தம் தொலைநகல்
பிரதிப்படாவிடில் தேய்ந்தழியும்